Nijjoar

0
24

Dit wordt het tweede joar van onze rubriek ‘Ik Proat Plat’. Noamens mien pazzipanten Piet de Vries, Henk Wierenga en onze toalcontroleur Alie de Vries, wil ik jim het allerbeste wensen veur 2019 en jim danken veur het lezen van onze Westerkwartieder stukjes ien dizze kraant. We kriegen reacties van verscheidene kanten. Zo wa-der n lezer wat kwoad op Henk omdat die docht dat Henk ziek was en niks verteld had. Henk had et verhoal gewoon uut zien duum zogen. En n doame uut et Westen van t laand gaf aan dat ze onze stukjes bruukte om t Westerkwartiers te leren. Oflopen zummer kon ze heur al oardeg verstoan moaken. Reden genog om ien elk geval nog een joar deur te goan.

We hemmen t idee oppakt om dit joar wat meer aandacht te besteden aan n poar biezundere onderwaarpen. Het feit dat we dit joar één nije gemeente hemmen en dat ien Tolbert het Wytze Keuningjaar viert wordt zal as n rooie droad deur onze verhoalen lopen. Keuning is een Tolberter schriever, met een fascinatie veur t Oosten, die 70 jaar noa zien dood, wereldberoemd is. We goan gewoon deur met et wekelekse Mientje en willen jim vroagen om aparte Westerkwatierder aan te leveren. Gewoon opsturen noar onderstoand mail-adres.

Die nije gemeente Westerkwartier volgen we natuurlek op de voet. Hoe zil dat nije gemeentebestuur veur de dag kommen. Lukt et de gemeente Westerkwartier om dicht bij de burgers te stoan, goed te luustern noar onze wensen en niet te veul ien e eigen navvel te stoaren,  ‘zo’n nieuwe organisatie vraagt zoveel aanpassingen’. Het eerste zwoare onderwaarp leit al op toavel. De cultuur- ambtenoar liekt te verdwienen en eerlek woar, doar wadden we n joar leden al bang veur. ‘Cultuur en sport zillen wel weer de sluutpost worden’, was de mening van n aantal ienstanties en die hemmen zelf het veurtouw nommen. Ze beschreven ien n manifest, de culturele riekdom van de olle 4 gemeenten. Mor luusteren, ho mor! Ien t kört mor es op bezoek bij de nije cultuur-wetholder en heuren wat hij/zij te melden het!  As die dan mor wel Westerkwartiers verstoan kin?

Gelukkeg hemmen we altied de rieke historie van Leek, Zuudhörn, Grootegast en Moarum nog. Uut ‘de Olle Deus’ van dizze gemeenten willen we wat verhoalen schrieven. Hoe kwam LEGO ooit ien Grootegast terecht, hoe zat t met die reuzentandem, woarom werd Ezinge tiedelek noar t Hogeland schoven, welke grote artiesten kwammen er alpmoal ien e Kruusweg, optreden of was de wereldberoemde feestweek van Zeuvenhuzen. Verras ons met nog meer onderwaarpen. Stuur n mail met n idee en we nimmen contact op en zuuken et uut.

Ja en dan die Wytze Keuning. Geboren ien Tolbert as zeun van n caféholder uut n vrij bekende familie (dichter Willem Eduard Keuning, ok bekend as Willem de Merode was familie). Wytze werd onderwiezer en schreef eerst schoelboekjes. Doarnoa begon er met et schrieven van feuilletons. Ien 1941 verscheen zien roman ‘Asoka, de wilde prins’, het eerste deel van n drieluuk over n Indiase prins. Vremd want doar was Keuning hielemoal nog nooit west. Een joar loater publiceerde hij de streekroman ‘De Fakkel’ over het boerenleven, hielendal terug te brengen op het dörp Tolbert. De dialogen bennen ien t dialect opschreven en dat is veur ‘Ik Proat Plat’ natuurlek weer n mooi ‘hoakje’. Zitten der nog mooie woorden en uutdrukkings ien, die onderhand verdwenen bennen? We kommen ze tegen en zillen ok n aantal körte verhoalen omtoalen noar t Westerkwartiers. Dizze zummer wordt er ien Tolbert een nij toneelstuk speuld, baseerd op t waark van Keuning.

Jim lezen t wel. Plannen genog. De tiedeleke burgemeester Koos Wiersma is aanwezen en komt uut Griepskerk, dus dat ken al niet meer stuk. Het nije college zil met n poar week ok wel beëdigd worden.

Alleen jammer dat er dit joar bij de gemeenten nog mor één Nij-joarsveziede is!

LAAT EEN REACTIE ACHTER

Please enter your comment!
Please enter your name here