‘Rondje deur Mien Westerkwartier op Kerkepad’

STREEK – Veureg joar schreven we elke week ien e rubriek ‘Rondje deur Mien Westerkwartier’ een verhoal over één van dörpen uut et Westerkwartier. Mooie verhoalen over gebouwen, gebruken en biezundere gebeurtenissen. Ons veurroadje, met dik viefteg verhoalen, leit nou op de plank een beetje te verstoffen. Dat vonden we schane, Mien Westerkwartier en de Streekkrant hemmen t plan opvat om de verhoalen dizze zummer, nij leven ien te bloazen. We willen acht middoagen organiseren ien olle kerkjes van de vier Westerkwartier-gemeenten. We zuken nou mooie kerkjes, die animo hemmen, om met de doen aan dizze kerkentour.

Wat is t plan. Op acht zundagmiddoagen kommen vertellers en muzikanten noar n kerkje ien t Westerkwartier. Ien twee programmadelen worden dan 3 verhoalen en muziek brocht. Tussendeur is er n pauze met kovvie en koek. De verhoalen goan over de dörpen ien de directe omgeving van e kerk. Ien Lutjegast wordt dan bv verteld over ‘De brug van Eibersburen’, ‘De schoelmeester van Grootegast’ en ‘De grensperikelen bij t Dörp’. Ien Den Hörn kommen noast ‘De Heilige Margaretha’, ‘Het café van Enumatil’ en ‘Klooster Auwerd’ aan bod. Zo peberen we alle dörpen van de nije gemeente Westerkwartier te bestrieken.

Het idee is, om 4 middoagen veur de zummervekaansie (mei/juni) te doen en vier noa de vekaansie (augustus/september). Hopelek is t dan mooi zummers weer en kin het publiek eerst rusteg een rondje op de fiets moaken en komt dan om 15:00 uur aan ien e kerk veur mooie verhoalen, fijne meziek en n lekker kopke kovvie met koek.

De voertoal van de middag is Westerkwartiers. De vertellers bennen allemoal lid van vertelcollectief ‘Kom op Verhoal’ en de muzikanten zingen, as ze t kinnen, ien e streektoal. De muzikanten kommen het liefst uut t eigen dörp en huvven gien breed repertoire te hemmen (5-6 nummers is genog).

Nou komt de hamvroag(en):

Bennen er kerken die interesse hemmen om zo’n middag met Mien Westerkwartier te organiseren
Bennen er groepen of lössemuzikanten die groag metdoen willen aan zo’n middag.

Ien beide gevallen, of as je andere vroagen hemmen, groag een mailtje sturen noar info@mienwesterkwartier.nl

Nou kin je denken, is dat niet een beetje sneu veur die caféholder of dat dörpshuus die ok wel es zukswat organiseren wil? Dat is hielemoal niet sneu, want ok bij aandere gelegenheden (zowel binnen as buten) kommen we groag langs met de typische streekverhoalen van t Westerkwartier.