Groots Op Vekaanzie

0
635

Op vekaanzie goan is veur de meeste Nederlanders de normoalste zoak van e wereld. De meeste lu goan zelfs meermoalen per joar eefkes vot en een buurman die n reiske noar Thailand, Japan of Nieuw-Zeeland moakt, doar kikt gieneen meer van op. Der kleven natuurlek wel n poar problemen aan: je moeten et aan tied hemmen, vliegen en autorieden is slecht veur et milieu en vanzelf de centerij, want niks is omme nucht.

Noa de oorlog kregen we met zien allen steeds meer vrije tied, ok al kin-we nou weer loater met pensioen. Butendes willen de meeste minsen noast hun waark niet al te veul vaste verplichtings aangoan. ‘Ik wil best wat doen, mor as t mij uut komt.’ Dan hol je meer tied over veur de rest.

Dat betekent ok dat deelnoame aan sportclubs en zukswat ok minder wordt. Dat wordt ienruild veur n uurtje sportschoel, eefkes lekker wandeln of een rondje op e fiets, al dan niet met elektrische ondersteuning. Deurdat er minder verplichtings bennen is het wel makkeleker om zo nou en dan eefkes ien e auto te springen en der n poar doagen op uut te goan. En dan kom je weerom met grote verhoalen over die unieke belevenissen, die je dizze keer weer metmoakt hemmen.

Tegenwoordig kin je voak veurdeliger met t vliegtuug goan dan met eigen auto rieden. Met as bijkommend veurdeel, je bennen ok nog es eerder op et plak van bestemming. Huur je doar weer eefkes een scooter of een jeepke en dan ontdek je zo t butenland. Het is natuurlek wel van de zotte dat die hiele reizerij host vergeefs is, want et is ok nog es hiel slecht veur ons milieu. Eén reiske met et vliegtuug is geliek aan n hiel joar ien je autooke rondtuffen. Doarom is t wiezer om mor wat dichter bij huus te blieven. Nederland, Duutsland en België hemmen ook veul moois te bieden en vertel me nou niet da-je dat alpmoal al zien hemmen, want dat is vast niet woar!

Ja…, en dan nog de centerij, want je willen op reis ok wat verteren. Je hemmen niet overal een neef of nicht wonen, die roept van: ‘Kist wel bie ons sloapen en één bordje meer of minder aan toavel, doar vernemen we niks van.’ Je kriegen vanzelf vekaanziegeld ien e meimoand, mor as je eefkes niet oppassen, is dat veur de eerste hiete dag al op.

En der bennen natuurlek ook minsen die t niet al te breed hemmen en et zich eileks niet permitteren kinnen om op vekaanzie te goan. As er dan ok nog lutje kiender bennen dan is dat extra sneu. Op de vroag van de juf: ‘En Jantje waar zijn jullie naar toe geweest in de vakantie?’, volgt een stilzwiegen van t jonkje of wichtje.

Doarom is het initiatief van Appie Wijma uut Opende geweldeg! De opening van de camping ‘Polemonium’ (De Joacobsledder), een plek woar minsen die anders niet op vekaanzie kennen, vergeefs kamperen magen. Aan belangstelling gien gebrek, vanuut et hiele laand willen ze groag noar Opende kommen. En ok bennen er veul lu, die Appie helpen willen met tenten, luchtbedden, fietsen, stoelen…, je kinnen et zo gek niet bedenken of het wordt aanbrocht op de Broersma’s Reed.

Doarnoast nog n koppeltje ‘Handige Harries’ die bouwen en knutselen kennen en zo stampten ze ien Opende ien n poar week tied een unieke camping uut e grond. Dizze week bennen de eerste gasten arriveerd en zo as et nou liekt bennen dat zeker niet de lesten. Appie zelf het nou meschien wel veul meer plezier dan wanneer hij op vekaanzie goan was. Al die stroalende bezoekers en de gulle en actieve helpers. Doar mag hij groots op weden! Meer van dat soort lu, zol k zeggen!

Mientje: Riekdom zit niet ien e beurs, mor ien et haart!