Abel Tasman Struuntocht
Summege zoaken begunnen met n dreum, lieken niet hoalboar, mor kommen er toch, omdat minsen hun dreumen noajoagen en andere minsen enthousiast moaken veur n idee. Begun jannewoarie overleed Piet Miedema, die we kennen as e drievende kracht achter e Abel Tasman Struuntocht van Lutjegast. Dit grootse wandelevenement trok al vief keer deur et Westerkwartier en brocht veul wandeloars en publiek op de been.
Piet Miedema sprak ien 2002 achter ien zien tuun met n poar kammeroaden over zien dreum. Hij wol ien t Westerkwartier een groots wandelevenement organiseren. De reacties wadden positief en er werd besloten dat Piet en Gerrit de Boer, om ervoaring op te doen, eerst de Wâlddykrintocht’ lopen zollen. Beide mannen kwammen enthousiast weerom uut Fryslân en met n groepke actievelingen werd verder keken, hoe ze zo’n tocht veur mekoar kriegen konden. De Stichting Promotie Lutjegast (SPL) werd doarveur ien e benen holpen, want er kwam flink wat bij kieken. Woar loop je langs en hoe lang worden de routes, hoe organiseer je de veurzienings langs de route en wat kin je de lopers aan vertier bieden? Mor ok: Hoe numen we de tocht en hoe kom we aan cinten om dit te organiseren?
Vanwege de noamsbekendheid van de wereldreiziger en de wens om niet allinneg over asfalt te wandeln, viel de keuze veur de noam op ‘Abel Tasman Struuntocht’. Met wat geld van Dörpsbelangen Lutjegast en de steun van e gemeente Grootegast werd deurpakt. Piet Miedema pakte zien rol as veurzitter steveg op. Om e 3 week vergoadern, draaiboeken moaken, contacten onderholden met de dörpen en routes uutzetten die alle dörpen van e gemeente Grootegast aandeden.
Doarnoast veul aandacht veur de promotie met et bekende logo van de wandelende Tasman, shirts en jaskes met de noam van de sponsoren, regelmoateg media-aandacht en n speciale Struuntocht-editie van De Streekkrant. De wandeloars mosten et evenement van Lutjegast natuurlek wel vienden kinnen.
Op 13 september 2003 kon burgemeester Kor Dijkstra et startschot geven veur de eerste ‘Abel Tasman Struuntocht’. Ruum 3000 wandeloars liepen via Doezum, Kornhörn, Sebaldeburen en Oldekerk weerom noar Lutjegast. Sums over de weg, voak over fietspadjes, mor ok deels strunend deur velden, die specioal veur dit spektoakel opensteld werden.
t Weer was schitterend, de vrijwilligers langs de route liepen zich t vuur uut e slovven en de wandeloars genoten: ‘Nog nooit zo’n goed georganiseerde tocht gelopen en wat een prachtig landschap hebben jullie hier!’, was de reactie van veul lopers. Noast de wandeloars ok veul publiek om aan te moedigen en verscheidene old-ienwoners van Lutjegast, die de Struuntocht n mooie aanleiding vonden om weer es ien hun geboorteplak te kieken.
Het succes van dizze eerste tocht smoakte noar meer. Verbeterpuntjes werden aanscharpt om de wandeloars nog beter te vermoaken. Ien 2007 schoot Max van der Berg de eerste groep lopers veur de tweede editie weg. Meer wandeloars, veul meer activiteiten langs de route en met n groot feest op et finishterrein, inclusief een ‘Bloarenbal’.
De derde editie ien 2011 stond ien t teken van e continenten. De 4500 wandeloars trokken via Europa, Afrika, Amerika, Azië en natuurlek het Oceanië, woar Tasman furore moakte, deur n kleurriek Westerkwartier. Bij de finish liep men Fantasialand binnen, met wonderboarleke figuranten, een schitterend decor en n lekker hapje en drankje.
Veur de vierde editie ien 2015 werd veur et eerst gebruuk moakt van bussen, die de wandeloars noar t zuudoosten brochten, bij t startpunt Standheem ien Opende. Et thema was ’Wotter’ woarbij, ok veur et eerst, een goed doel ‘Water For Life’ steund werd.
Ondertussen had Piet Miedema ofscheid nommen as veurzitter van de SPL en zien veurzittershoamer overdroagen aan Bert v.d. Vaart. Ien 2019 was er de viefde editie, woarbij de bussen dizze keer noar t noordoosten reden. De wandeloars liepen vanof station Zuudhörn noar de finish en de weergoden wadden Lutjegast weer goed gestemd en de wandeloars genoten vannijs volop van de natuur, theater en muziek.
Zunder ‘trekkers’ as Piet Miedema was e Struuntocht nooit van e grond kommen. Zien vermogen om e juuste minsen ‘derbij te trekken’ en te verbienden was groot. Piet zien durf en enthousiasme waarkte aanstekelek en gien probleem was zo groot dat er gien oplössing kwam.
De ienzet van veul vrijwillegers en de soamenwerking met de bewoners langs de route zörgen veur n werkelek ‘Meroakel ien t Westerkwartier’ dat hoog aanschreven stijt bij wandeloars en publiek. Ien 2023 hoopt de SPL de zesde editie van de Struuntocht te organiseren, ok as eerbetoon aan die biezundere Westerkwartierder, Piet Miedema.
Geert Zijlstra (met dank aan Eelke Solle)
Mientje: “Strunen met dij, is t mooiste wat er is!”
