CC-Races
Op dit ogenblik is er ien e Cazemierboerderij van Tolbert een tentoonstelling over de roemruchte CC-races, die ien t verleden ien t dörp holden werden. Dat was mie toch n happening.
De eerste race was ien 1950. t Was n initiatief van Dörpsvereneging Oldebert. Der wadden twee mannen, Cornelis (Cees) Siersmoa en Cornelis (Cees) Sikkemoa, die beiden van motorrieden hielden, zij hemmen t spul ien gang zet. Ien soamenwarking met e Motorclub Moarum en VVV Leek konden ze toen n wedstried organiseren veur jonge coureurs.
t Hiele dörp warkte der aan met, zoas men dat ien Tolbert wend is. De vrouwen, al dan niet organiseerd deur de Plattelandsvrouwen, regelende lunchpakketten, zörgende veur soep en al dat soort dingen. Spandoeken werden der moakt en ien t dörp werd bie gezinnen onderdak zöcht veur de coureurs. Wat n organisoatie!
t Parcours was toen de Zuderweg langs, de Hoofdstroat noar Midwol, bie Joager rechtsof de Midwolderweg op en woar nou de rotonde Leek is, weer rechtsof noar Tolbert toe. Langs et circuit lagen stropakken, sponsord deur Strokartonfebriek Erica ien Oostwold. En op e dag van e races ree de Drachster Tram niet. Mor zoas t voak gijt, vief joar loater werd et circuit ofkeurd, t was te gevoarlek.
Toen bleef het n pooske stil, mor vieftien joar loater werd er n nij initiatief opzet ien soamenwarking met de Nederlandse Motorsportbond. Een compleet nij parcours deur wat men toen de nijbouw van Tolbert nuumde, Leuringsloan, Oldebertweg, Auwemoaloan, de Beelen. Toch kwam ok doar de klad ien. Der wadden te veul stoeprandjes en dat soort dingen en de veilegheid van de coureurs was weer ien gevoar. Dus week men ien 1979 uut noar n circuit aan de Noordkant van de A7. Dat was n mega-organisoatie, der most langs de A7 een doek spand worden zodat vanof de weg de motoren niet zichtboar wadden. Want dat kon zörgen veur gevoarleke situoaties. t Het hiel wat zwit en gemopper kost, t was host niet te doen, as et n bietje steveg waaide dan bleven ze aan e gang. En zo kwammen der aal meer regels woaraan voldoan worden most, t was op e duur niet meer te doen.
Tolbert hoalde ien 1984 de wereldpers toen de legendarische Jack Middelburg verongelukte op t stroatencircuit van Tolbert. Hij vocht een duel uut met Boet van Dulmen met et noodlot as gevolg. Doarnoa kwammen der nog meer regels. De leste race werd verreden ien 2004, toen viel et doek. Ontzettend jammer.
De stichting CC races bestijt nog, ien die zin dat ze niet meer ienschreven stoan bie de KvK. Dus alle kosten binnen der uut. Der binnen nog n aantal bestuursleden die kosteleke herinneringen hemmen aan de races. Ze hemmen ons doar wat van verteld op 3 juli ien e CazemierBoerderij.
Doar kwammen de verhoalen lös onder t genot van n borreltje. Hoe ze ien heur clubhuus (Club 94 aan de Pasop) soavends altied nog n poar ofzakkertjes nammen en dat et eigenlek, buten et veule wark dat er verzet worden most, altied n feest was. En as dizze bestuursleden uut e tied roaken, dan starft de stichting een stille dood.
Tot 27 augustus is de expositie nog te zien ien e CazemierBoerderij. t Is zeer de moeite weerd. Je kinnen der elke zotterdagmiddag terecht.
Piet de Vries
Mientje: Rieden is niet gevoarlek, crashen wel.