De Bode

Afbeelding
ik proat plat! doe ok?
Al tientallen joaren is der n verandering goande op t platteland. Der binnen bijveurbeeld veul minder boeren. De boeren die der nog wel binnen hemmen veul grotere bedrieven. Ok ien e dörpen is der hiel veul veranderd. Wadden der vroeger ien n dörp van nog gien duzend ienwoners, meerdere bakkers, slachters en krudeniers, tegenwoordig is doar niet veul meer van over.
Der niet allinneg minder bedrieven ien n dörp, der binnen ok hiele bedriefstakken en ambachten verdwenen. Eén van die verdwenen beroepen is dat van boderieder. Host elk dörp had wel één of meer boderieders. Ien Grootegast had je biiveurbeeld van der Wielen en Hofsteenge, ien Oldekerk Gorter, ien Griepskerk Zuidema en ien e Kornhörn Wierenga. Dit is mor n kleine selectie van boderieders uut t Westerkwartier.
Wat dee een boderieder. Je kinnen et een klein beetje vergelieken met de pakketbezörger van tegenwoordeg. Allinneg was t wark van e boderieder veul uutgebreider en met veul meer regeltjes, opleid deur de overheid. Veur t beroep van boderieder most je noast n beroepsopleiding ok nog minimoal 2 joar ervoaring hemmen veur je as zelfstandeg boderieder aan e slag konden. Ok most je n verkloaring van goed gedrag hemmen. As dat allemoal ien orde was kon je een boderit overnimmen. Dat hiel ien dat je een vaste route hadden. En die mos je altied rieden, ok ien vekaanties.
De bode vervoerde van alles. Dat kon groenten noar de veiling weden. Of de hiele beveurroading van n winkel. Mor ok mosten der medecienen veur de beesten hoald worden bij apotheek de Jonge. De jonge verkocht ok n drankje dat hiel veul minsen die ofrieden mosten, veur heur riebewies,  iennammen. Je werden der noamelijk wel rusteg mor niet sloapereg van. Veur minsen most je bij de apotheek van Wermeskerken weden. Tamling har veur n hieleboel ziektes kruden. Mor net zo makkelek most hij met n stukje goaren as veurbeeld noar ‘De Wolbaal’ om zakken vol goaren te hoalen. Of met n korset noar van der Vat om dat te loaten repareren. Alle weken wadden der wel minsen die heur gebit stuk hadden. Dat ging dan ok met de bode met, die wist wel woar t weer moakt worden kon. Har je zulf nog gien wasmachine, of vond je wassen beneden je stand, dan brocht de bode het wel noar n wasserij. Je hadden ien die tied ok overhemden met lösse boorden. Die gingen dan noar wasserij De Vlijt om wossen en “steven” te worden. En de bontjassen, van bepoalde mensen, mosten zummers ien de kluis bij Zwartsenberg.
De  beveurroading van e winkels is ok veranderd. Tegenwoordeg het elke winkelketen zien eigen distributiecentrum en brengt elke dag minimoal één keer nije veurroad. Ien e tied dat de bode nog reed har elke krudenier een eigen magezien.
Ok mos de boderieder hiel discreet weden en goed zien mond holden kinnen. Het gebeurde wel es dat één wat aan zien buurman verkocht, mor dat de buurman niet wist wel de verkoper was. Dan nam de bode het spul met, kreeg een vrachtbrief met woar een andere ofzender opstond en zo wer dat dan ofleverd.
Vekaansiegeld veur de mensen ien e bouw wer niet rechtstreeks uutbetoald aan de minsen. Ze kregen vekaansiebonnen. De bode kreeg dan n groot bedrag aan contant geld met om die bonnen ien Stad te kopen.
Ien die tied wadden condooms nog niet overal verkriegboar, doar had de bode ok wel weer een adresje veur. Die werden ien advertenties trouwens as gummiwoaren aanprezen. Ok hier har de opdrachtgever der gien belang bij dat dit ien t hiele dörp bekend werd.
Nog andere dingen die met de bode gingen: Zieke of dooie beesten noar de gezondheidsdienst veur dieren. Geslachte pieken, kievitseier en wild noar restaurants.
As de minsen wat kochten werd dat ok voak verstuurd. Met poasen een nij pak van Meyering, mor net zo makkelek peerdevlees, peerdeworst of garnoalen kroketten.
Kortom je kennen het niet zo gek bedenken of de bode het, het wel us ien zien auto had.

UIT DE KRANT