De Hooge Reed
Ien oktober 2012 is er n nij wandelpad van drie kilometer opend bij Lutjegast, met de noam Hooge Reed. Je kinnen begunnen aan de Bombay en t pad komt uut ien e Mieden en lopt dan langs de Doezummertocht weerom noar de Bombay.
Eigleks is t gien nij pad, mor n old pad dat weer opend is veur wandeloars en natuurliefhebbers.
Rond 1900 stonden der tussen de Bombay en e Mieden n stuk of acht eenvoudege huuskes. De bouwkundege stoat van e huuskes was behoorlek slecht, eileks is plaggenhut n betere benoaming. Ien onze tied is t ondenkboar dat mensen zo wonen en leven konden. De leefomstandigheden wadden bar slecht en de omliggende graslanden wadden altied slim nat. De bewoners van e Hooge Reed mosten hard warken veur n koareg bestoan.
Keuterboerkes wadden et, ze hadden n klein stukje laand woar ze de hiele dag op aan t vrutten wadden. De melk van koe of geit en t vlees van wat dieren leverde net genog op om te overleven. Wij zien t nou as bittere armoede, mor of de bewoners dat wel zo ervoaren hemmen is de vroag. Der was veul saamhoregheid onder de bewoners en zo kwammen ze met mekoar deur de tied.
Ondank veul verbouwings binnen de huuskes uuteindelek allemoal verdwenen.
Halverwege t pad is n infobord en n soort roam, as je doar deur kieken zie je ongeveer hoe ter begun 1900 uut zien het ien dit gebied. Je kinnen nog enkele kenmarken ien t landschap ontdekken.
t Pad leit ien e polder de Bombay, dizze polder bestijt uut hoge mieden, petgatten, nat hooiland en laagveen bos. Noast de noam van e polder en van e weg, is er ok nog n meulen met de noam Bombay. De meulen is ien 1877 ploatst en is òfkomsteg uut Mijdrecht (Utrecht).
Ien Mijdrecht wadden meerdere meulens nuumd noar grote steden ien e wereld.
De Bombay polder dankt zien noam dus aan de meulen die de polder dreug leid het.
Joaren leden is de meulen gedeeltelek ofbroken en dut sinds 2010 dienst as woonhuus.
Veul stukken laand ien dit gebied hebben een veldnoam. Boeren gaven voak de achternoam van e veurege eigenoar aan t perceel, wanneer zei n stuk laand kocht hadden.
Ien e Hogemieden lag n stuk laand met de noam Graslanden. Boerderij de Graslanden stijt op t kruuspunt Bovenweg/Langeweg ien Grodegast. t Perceel heurde dus ooit bij dizze boerderij.
Der is ok n stuk laand met de noam Kroeskoppen, dit stuk dankt zien noam aan n opmerkeleke bewoner van e Hooge Reed, Jan Postma, die algemeen bekend was onder zien bijnoam Jan Kroeskop, de noam het er vanwege zien kop vol met krullen. Deur t gemeentebestuur van Grodegast was er n bordje op zien onderkommen aanbrocht woarop ‘onbewoonbaar verklaard’ ston, mor Jan had ‘on’ drekt wegkraabt. t Gemeentebestuur liet hum toen mor met rust. De olle vrijgezel het 37 joar ien dizze armzoalege hut te midden van veenplassen en woeste grond leeft. Hij sliep op n bos stro en leefde van de opbrengst van zien stukje grond en van zien geit. Sums kreeg er wat toestopt deur minsen uut e buurt. De Kroeskop was zulfs veur die tijd n opmerkelek persoon en het de geschiedenis van e Hoogemieden kleur geven.
De Hooge Reed was tot de joaren 60 een karrepad, mor allinneg ien dreuge tieden kon der n peerd en woagen over. t Pad kwam uut op e Mieden, dat tot ien e joaren 60 n zandpad was met n smal fietspadje der noast. Kwam er bij winterdag één uut e tied, dan hadden ze grote moeite om e liekkist over t pad noar de verharde weg te kriegen veur de begroavenis. Zundags liepen de kerkgangers over t pad noar n hoger gelegen boerderij aan De Wieren ien Lutjegast. Doar verruilende ze de natte, modderege stevels of klompen veur zundagse schoenen.
De petgatten ien de Mieden werden lang bruukt veur t störten van òfval. Meneg kolenkachel en pietereulielamp het zien enne vonden ien t veen van de Mieden.
t Woaterpeil ien e polder is ien e òfgelopen eeuw stark doald, allinneg de noam herinnert nog aan andere, nattere tieden.
t Pad is nou bij tieden ok nog slim nat, mor t is wel heul mooi dat op initiatief van Staatsbosbeheer, IVN en De Dotterbloem en financiële steun t pad weer toegankelek is veur de wandeloar en natuurliefhebber, want der is genog te zien en te ontdekken ien alle joargetieden.
Leneke Struiksma
Mientje: ‘Dat is proat as n pet zunder klep.’
