Doppers

Oldjoars-stunts kommen ien t hiele land veur, denk aan t LEGO-beeld van André Hazes dat opdook ien Oldeberkoop. Ien t Westerkwartier hemmen we dizze mooi gewoonte ok al joaren, zoas ien Tolbert en Doezum doar kinnen ze der ok wat van! Op t enne van t joar bezörgen de jongens en wichter van de DOP (Doezumer Oudejaars Ploeg) de bewoners van Doezum n poar meroakels mooie doagen. Al derteg joar lang binnen der, de leste drie doagen van t joar, veul activiteiten ien Doezum woar jong en old bij betrokken worden.

De Doppers binnen ooit begonnen met as doelstelling n feestavond te organiseren op ollejoarsnacht om zo vernielings en overlast te veurkommen. Eén van e hoogtpunten van de DOP is de joarlekse stunt. De Doppers proberen op ludieke wieze aandacht te vroagen veur wat de Doezumers, Grunnegers of Nederlanders bezig holdt. Op oldjoarsdag wordt de oldjoars-stunt, via DOP-radio die rond de joarwisseling 3 doagen ien e eter is, bekend moakt aan e ienwoners van Doezum.

De Oldjoars-stunt vragt op n ludieke manier aandacht veur zoaken, die lokoal, provincioal of zelfs landelek speulen en sums met n positief effect. Zoas t Doppad deur t Doezumerbos aanleggen of de roep om een nij Doezumer dörpshuus, het resulteerde, ien 2021, tot de opening van ’t Stuurhuus’.

Met et DOPlespark vroegen ze aandacht veur meer nijbouw veur jongern die groag ien Doezum bouwen willen. De grode letters werden leend uut et Roblespark van Grootegast. Ien 1999 hadden ze n variant op Big Brother, de Big Dopper. Dokters Opleiding Post (DOP) werd de nije noam veur t UMCG en et FEC ien Leeuwarden kreeg n nij standbeeld: ‘De Dominomus’. Ien 2008 was t n hiele mooie stunt, met n stevege knipoog noar Grodegast woar ze dat  joar veur 20.000 euro een kunststof-iesboan op t Marktplein aanleid hadden. Omdat et toevalleg vroor ien die periode moeken de DOPpers zelf n iesboan op n stukje laand midden ien t dörp. Doar kon meer dan n week op scheuveld worden.

De leste twee joar, om de welbekende reden, binnen de meeste activiteiten online mor ok dat zörgt veur verbinding onder de Doezumers. Dit joar werden alle Doezumers via DOP-radio oproepen om noar de Peebosserbrug te goan. Om t extra spannend te moaken werd er n tipke van e sluier oplicht. Der zol n heul bekende tweeling zien opwachting moaken ien Doezum. t Zol n landelek bekende tweeling wezen ze hadden zulfs metspeult ien films. Wel zollen dat wezen? Frank en Ronald de Boer? Of de gebroeders Anker? En hoe zollen ze aankommen, ien limousine, met n helicopter of per boot? Om twee uur stonden der al heul wat Doezummers bij de brug, allemoal onder n paraplu want t regende flink. Zelfs Expeditie Grunnen van TV Noord was er bij, wat nog meer sjeu aan t gebeuren gaf. Aan e brug hongen drie spandoeken, woarvan één met e tekst “Met onze eigen tweeling achter het stuur, geeft de DOP aandacht aan de Doezumer natuur.” Toen was et wachten op de bekende tweeling en ondertussen klonk et lied van de film ‘De Kameleon’ en kwammen er nog twee, ien zwart pak geklede mannen, op n plof aanscheurd. Dat bleken twee criminele nozems uut e Stad te weden.

Toen kwam over de Doezumertocht de echte Kameleon aanvoaren met Hielke en Sietse Klinkhamer. Deur de veurzitter werden ze aan wal holpen en toen werd et verhoal achter de stunt dudelek.

t Oflopen joar het et uutbaggern van e Doezumertocht nogal wat ien t nijs west.  t Wotterschap had plannen om e Doezumertocht over n lengte van dik tien kilometer uut te baggern, woarveur twee baggerdepots aanleid worden mosten. De tegenstanders van t plan wollen gien baggerdepot veur t huus en wadden bang dat e natuur vernield worden zol. De veurstanders, ok de DOPpers, vienden et n goed idee dat e Doezumertocht eindelek es weer uutbaggerd wordt. Zo krigt de natuur weer ruumte om zien waark te doen, wat ok n goeie zoak is veur de beesten en planten ien en om e tocht.

De Doppers binnen bliede met et plan van t Wotterschap en brochten met dizze stunt onder de aandacht, dat deur et uutbaggern de tocht weer wat breder wordt. Meschien dat er dan van t zummer wat meer bootjes kommen. De tekst op n ander spandoek “Dankzij de uitgebaggerde sloot, kunnen we nu zeggen, we hebben een speedboot” kwam uut e Kameleon film. De spreuk op t derde spandoek “De Peebosserbrug blijft dicht vanwege een omgesmolten contragewicht” verwiest noar de stunt uut 2007 toen de DOP aandacht vroeg veur t renoveren van e olle brug. Ze hadden  toen n blauwe auto “leent” van t Drachtstervaartproject en et leek net of dizze auto deur de brug zakt was. t Het nog n poar joar duurd veurdat de brug renoveerd werd en nou bliekt dat er niet meer omhoog kin omdat de contragewichten vot binnen. Doar moet nog n vervolg op kommen vanzelf.

De DOPpers zörgen elk joar veur sensatie ien Doezum en ruum van te veuren vragt elkeneen zich of  ‘Wat zil der dit joar weer gebeuren’ en wat wordt er nou weer leend. Vanzelf worden alle “geleende” spullen altied netjes weerom brocht. Zo hol je n mooie traditie ien stand en zörg je veur veul vermoak.

Leneke Struiksma

Mientje:  “Hé jong dreumer, kiek es wat beter uut dien doppen!’