Ik proat plat

0
120

De Kapper

Zo’n vieftien joar leden ging ik soamen met mien vrouw noar China. Ien Stad was ik bevriend roakt met Yan Ping, die n stuk of wat Chinese restaurants had en we wadden met mekoar n handeltje begund. Spullen iemporteren vanuut China en spullen die kaant weer op sturen. Die spullen bestonden hoofdzoakelek uut grondstoffen, zoas old iezer, koeievellen, plastic ofval en al dat soort dingen. Ien China moeken ze doar weer nije dingen van.

Wat we doar wel niet vothoald hemmen is ongeleuvelek! t Varieert van servetjes tot snowscooters en alles wat doar tussen zit. Der was mooie handel bij en dat kon je hier dan met redeleke winst votzetten. Mor t gebeurde ok voak dat et complete  bagger was. Bijveurbeeld die servetjes, we lieten n poar pakketjes hierhin kommen die bedrukt wadden met bedriefslogo’s mor al die servetten zatten vol met inktvlekken. En peuter die Chinezen mor es an t verstand dat je zuks niet as verkoopveurbeeld bruken kennen. Ze bleven mor zeggen dat dit veurbeelden wadden en dat de te leveren spullen vlekvrij weden zollen. Moeilek, moeilek.

Mor afijn. Ik was al wel n keer of wat die kaant op west en dit keer zol de vrouw ok met. Soamen met Yan Ping die as reisleider, gids en tolk fungeren zol. n Combinoatie van zoaken en vekaanzie. Ik moet zeggen, t was n prachtege reis. Begund ien Hong Kong met zien schitterende nachteleke neonrecloame en vandoaruut met de hogesnelheidstrein noar Shenzen. Van alles hemmen we zien, we bennen ien Beijing west, ien e verboden stad, we hemmen over de Chinese muur lopen en nog veul meer dingen die dat land zo beroemd moaken.

Yan Ping wol ons alles van de Chinese cultuur zien loaten en doar heurt ok n bezoek aan de kapper bij. Tenminste, dat vond hij. En dus gingen we doar op n oavend hen. Ien e salon was n stel mooie wichter aan t waark. Wij werden met zien drieën op e rieg ien n stoel zet en ons hoar werd wossen. Krekt zo as hier bij ons, achterover met e kop ien n kuup en met shampoo en hiet wotter werd de kop goed schrobt. Lekker man. Doarnoa volgde de knipbeurt en ok dat wiekt niks of van het gebeuren hier. Oren, neus en wenkbrauwen werden ok met nommen.

En toen ging het gebeuren. De noagels van e handen werden netjes knipt, vield en schoonmoakt en ok die van e voeten kregen een beurt. De voeten werden eerst wossen en iensmeerd met n heerlek rukende eulie. Toen begon t wicht de tonen te masseren. Normoal gesproken ben ik nogal kieteleg onder de voeten, mor dizze keer kon ik t verdroagen. Man wat was dat lekker. Over de kleren hin ging ze langzoam hogerop met masseren en toen ze zowat aan t kruus toe was begon ze van boven of aan. De kop, de oren, de hals en zo langzoam omdel. Al met al bennen ze meer dan n uur bezeg west om ons te verwennen. Echt geweldeg! De pikante delen van t lief werden netjes oversloagen.

En doar heb ik Yan Ping loater wel even noar vroagd. Is dat nou altied zo of was dat allènt die oavend. Hij verzekerde mij dat het echt wel kend had, starker nog, as de vrouw der niet bij west was zollen ze ons dat zeker vroagd hemmen. “Happy end sir?” Ik wiet niet of er ien Nederland van dit soort kapsalons bennen. Ik ken ze niet. Zal we dat ok mor zo loaten?

Piet de Vries.

Mientje:  t Leven is n zoak van nemen en nommen worden