Ik proat plat

Afbeelding
ik proat plat! doe ok?

De tandarts

Ik geef t drekt toe. Ik ken gien schoamte op dit gebied. Ik ben as de dood veur de tandarts. Veur mij is zo’n figuur, om het mor es ien goed Grunnings te zeggen, n bekbeul. Ze kennen mij nog zoveul vertellen, dat het tegenwoordeg allemoal niks meer veurstelt en zo, ik heb nog nooit ien zo’n hoog/laag-relaxfauteuil zeten zunder dat mien zenen en mien spieren zo gespannen wadden as de boog van n indioan. Doagen loater is nog alles ien e war.


En veur t geval dat n bult lezers nou geliek denken dat het wel kommen moet uut n jeugdtrauma of zo, nou, dat is niet zo. As jonkje most ik alle joaren twee keer noar tandarts Kuiper ien Griepskerk. Wat n lieve man was dat. Ik zie dat zo nog veur mie. Met zien mooie grieze hoar en vriendeleke  blauwe ogen keek hij noar beneden en proatte hij tegen je op zo’n geruststellende manier dat je je hielendal op je gemak vuulden. Je wizzen ok wel dat er niks gebeuren kon, je hadden ja veurdat je noar hem toe gingen je tanden poetst totdat t bloed je uut e koaken liep. Zuks most toch twee keer per joar gebeuren veurdat je bie hem op bezuuk gingen.


Achterof bekeken stel ik ok vast dat die man n vakman was. Woar vrienden en andere aanheuregen om mie toe regelmoateg melden dat ze weer es n vulling kwiet bennen, is der bij mij ien alle koezen nog nooit n vulling uutvlogen. As je bij mij ien e mond kieken dan zie je ien alle koezen zo’n mooie zwarte amalgaamvulling zitten. Muurvast.


Mor woar is t dan uuteindelek toch fout goan? Dat begunde ien mien diensttied. Toen most ik ok noar de bekbeul, dat was de juuste benoaming veur de man. Die ropte en scheurde der ien om as Malle Jan ien e hoender en ik had noa die tied meer pien ien e bek as der veur. Mor met dat gedoe was mien twee keer per joar noar de ziekenfondstandarts wel verlopen en zo begunde ik het uut te stellen. Zestien joar loater kreeg ik n klein probleemke links boven en t leek me beter om mor even hen te goan. Het probleem werd verholpen met boor en smeer en ik kreeg n reken. Of ik even twee keer 30 gulden overmoaken wol, eerste 30 veur het binnenkommen en tweede 30 veur de behandeling. Ik belde hem op en vroeg of er zich niet vergiste, 60 gulden veur 10 menuten wark was toch wel veul. Hij verzekerde mij dat dit het normoale tarief was woarnoa ik hem vroeg of er mij dan ok nog even 20 gulden overmoaken wol, want hij had n poar week doarveur n deurmat bij mij ien e winkel kocht van 20 gulden en ik had vergeten om de 20 gulden veur het binnenkommen te rekenen. Jim snappen het verder wel....


Tien joar loater had ik op hetzulfde plak hetzulfde probleem weer. Noar n aandere beul. Die moakte het, mor toen zat er zo’n scharp kaantje aan dat ik aldeur de binnenkaant van e wang open had. Dat heb ik zulf mor n beetje bijvield en toen ging het wel. De man vroeg mij wel of ik dan n haalf joar loater weer kommen wol veur regelmoateg onderhold, veur 195 gulden saneerde hij alles en dan kon ik via het fonds weer verder. Mor ja, dat scharpe kaantje dat hij produceerd had liet mij ienzien dat het mor beter was van niet. Prutswark.


En toen ik nog 5 joar loater hetzulfde probleem weer had heb ik noar weer n aandere beul beld wat het kostte om die ene koes te trekken. Noa wat gesputter kreeg ik n pries van 35 euro. Ofsproak moakt en toen ik binnenkwam wol de assistente eerst een “gebitstaat” opmoaken. Toen ik zee dat as het niks bovenop die 35 euro brocht zag ze der vanof. Wel wol ze eerst n foto moaken. Zulfde ritueel. Uuteindelek trok de beul mij die koes der uut en de eindstand is nou dat ik noa al die joaren en prutserijen n perfect gebit heb, woarien 1 koes ontbrekt. Mor dat zit niet ien t zicht dus is t niet slim. Met dank aan tandarts Kuiper uut Griepskerk die de boases leid het veur laank een stark gebit. En ik poets alle doagen volgens de veurschriften.


Piet de Vries


Mientje: Dan jeuken hem de koezen niet meer.

UIT DE KRANT