Ik proat plat

Afbeelding
ik proat plat! doe ok?

Verdwenen Beroepen

Een joar lang schreven we ien dizze rubriek over beroepen die vroeger hiel normoal wadden en nou zeer biezunder bennen. Dat leek ons eerst n hiele toer, hoe vien je viefteg beroepen, mor dat bleek met te valen. Dat we dat ok nog es deden ien n joar woar bepoalde beroepen bedreigd roaken en andern de kop opsteken is zuver toeval. 


Wie wa-der een joar leden bewust van virologen, IC-artsen, jongens en wichter die winkelwoagenkjes ontsmetten en mondkapke-ontwerpers, die design-snuutschuutjes moaken. En hoe komt het noa 2020 met caféholders, stewardessen en kleine winkeliers, bennen dat straks de dinosauriërs van et Corona-tiedperk.


De rubriek verdwenen beroepen hemmen veul reacties opleverd en sums zeer onverwacht. Regelmoateg kwam der n tip om een bepoald beroep ok es n keer te belichten of stuurden jim een fotoke van n biezunder fetuut dat vroeger regelmoateg bruukt werd. Doarveur dank!


Drekt moet ik (Geert) et boetekleed aantrekken. Noar aanleiding van de Kalverschetser kreeg ik n aanbieding van zo’n originele schets, mits die dan mor op een goed stee terecht kommen zol. Dat goeie stee heb ik wel vonden, mor et tillefoonnummer van de aanbieder ben ik kwiet. As de aanbieder me nog n keer bellen wil met zien verhoal over de schets van zien favoriete koe (om die reden was de schets ok bewoard bleven), dan hol ik me aanbevolen en zörgen we dat de schets veileg opborgen wordt en bij tieden ien n expositie beland.


Drie zoaken sprongen der ien t biezunder uut. Ten eerste, rondom de boerenploats is der veul veranderd. Wadden et honderd joar leden nog de peerden en de arbeiders die et beeld bepoalende, Viefteg joar loater wadden et de pruttelende Zetorkes, MF-kes en Deutzen en der stonden melkmachines te stampen ien t laand. Nou bennen et de loopstallen, joepsters van trekkers en GPS die t beeld veur n belangriek deel bepoalen ien e landbouw. Schoalvergroting, saneringen en modernisering.


Ok het transport is staark veranderd. We hemmen alpmoal een eigen auto (of een E-bike) kocht en dus et collectief vervoer van bodediensten, beurtschippers werd minder. Lapkekoopmannen en kiepkirrels hemmen weineg emplooi meer aan huus, want we springen liever zelf ien e auto en rieden eefkes noar t Fean of de Liekeblom. Alhoewel…… Post-NL, DHL Deutsche Post hemmen die toak ien Corona-tied weer oppakt. Ien t uurke dat ik nou zit te typen, heb ik al drie buskes deur de stroat rieden zien.


Ten derde natuurlek de computer. Hoe hadden we ien negentienviefteg et thuuswaarken regelt? Ik zeg van NIET! Zelfs twinteg joar leden was t behelpen west met piepende modems, troage verbiendings en video-vergoadern met twee personen. Hoe hadden we ooit de medische gegevens van e GGD-test binnen één uur bij de huusarts kregen, loat stoan die last-minute bestelling van dat boek dat vlak veur de feestdoagen uutkwam en nog onder de boom leid worden moet. Dat was ons nooit lukt zonder Cloud, WiFi en Internet.


Mor of alle verandering ok verbetering is... Ien veul gevallen is de menseleke moat en et contact wegvallen en dat is natuurlek skande. Et tempo most omhoog, dus de postbode die eefkes een kopke koffie met dronk en ien e loop eefkes hielp bij t ienvullen van n moeilek formulier i-der niet meer bij. De boodschaploper die de bestelling hoalen kwam dan drekt et nijs uut et dörp vertelde, krigt nou n appke met et boodschappenliestje en zet zien krat met boodschappen snel op t aanrecht (en nou dus contactloos op e stoep).


We goan nou op noar t nije joar en hemmen, soamen met de Streekkrant, besloten om der nog een joar ‘Ik Proat Plat’ aan vast te plakken. Ien 2021 goan we op zuuk noar biezundere plakken ien e nije gemeente Westerkwartier. De gebouwen, gebieden en beelden, woar wij een verhoaltje bij vertellen, kin je dan zelf op e fiets opzuken en bekieken. Me dunkt der is genog te zien en der zal ok nog vast wel weer es n biezunder beroep laangskommen. Doarnoast holden we de lienen noar de tegenwoordege tied schaarp ien e goaten! 


Rest mij nog om jim noamens mien collega’s Piet en Henk een mooi 2021 te wensen en te bedanken veur t lezen en de reacties. Doarnoast willen we Alie de Vries uut Nuus danken, die wekeleks onze stukjes met e rooie potlood deurnemt en veurziet van verbeterings. Soamen stoan we staarker en elk zien eigen specialisme. Op noar n joar woar we mekoar, noar ik hoop, weer ontmoeten kinnen. 


Piet de Vries, Henk Wierenga en Geert Zijlstra



Mientje: Hij trekt al n poar joar van Drees! 

UIT DE KRANT