Ik proat plat
Letterberterpetten
De bovenstoande kop zel bie veul minsen de wenkbrauwen fronsen doen, de Lettelberterpetten binnen, zulfs ien onze gemeente, niet zo hiel bekend. Toch is dit een uniek noatuurgebied ien onze regio en doarom verdient het ien dizze rubriek de aandacht. Temeer omdat je der gewoon deurhin lopen kinnen, want er is n wandelpad van zo’n tweeënhalve kilometer.
As je deur Lettelbert hinrieden vanof Midwol kin je vlak veur dat je over het viaduct over de A7 goan, rechtsof noar beneden, en dan kom je op de parallelweg langs de autoboan. Dreks de eerste oafslag rechts noar de boerderij en je kommen ien een noatuurgebied woarvan je niet dreumen duren.
Vanoaf de boerderij is er een wandelpad deur het gebied dat grenst an het Leekstermeer en ik kin jim zeggen dat het onveurstelboar biezunder is. Allent al dit joar, dat nog mor n poar moand old is, hemmen noatuurbeheerders er n hoeveulheid vogels spot, het is niet te bevatten. Noast alle gewone soorten as eenden, ganzen, mezen, merels, kroaien, zeekoapen, weidevogels en zo is der een unieke serie vogels woarnommen. Ik zel der een poar opnumen.
Klapekster, Torenvalk, Buizerd, Koperwiek, Goudhaan, Dodaars, Smelleken, Sperwer, Havik, Zeearend, Specht, Kramsvogel, Groenling, Putter, Houtsnip, Roerdomp, Blauwsteern, Kemphaan, Kiekendief en nog veel meer. Ok otters en marters kommen der veur.
De noabijheid van het Leekstermeer het er noatuurlek ok n positieve ienvloed op. Van oorsprong is het gebied ontstoan deur ofgoavings van het veen. Bekend is dat het bos nuumd is noar Martje Kuper, een van de bewoonsters van die streel. Het bos hiet dan ok het “Bos van olle Mart’.
Ien het hiele Westerketier kom je de restanten van de veengebieden van vroeger tegen, je hemmen de Tolberter Petten, je hemmen de Jilt Dieksheide, je hemmen de opstrekkende koavels tussen Tolbert en Moarum woar alle sporen van de veenofgoavingen nog zichtboar binnen. Mor nargens is het zo terugbrocht noar de noatuur zoas ien de Lettelberterpetten. Dat komt met deur het feit dat er doar ok sproake is van Kwelwotter, ofkomsteg van het Drentse plateau. Doarop gedijen allerlei biezundere dieren, zoas de Zeggekorfslak, de Waterspitsmuis en de Dwergmuis.
Ien de vegetoatie zien je hiel veul grassoorten as Zegge’s en ok Krabbescheer. Kortom, as je van noatuur holden en ien ons eigen Westerketier nog es n mooie noatuurkuier moaken willen, goa dan es noar dit gebied. Je zellen aangenoam verrast worden. Hol je wel aan de regels en blief op de poaden, want het veurjoar is broedtied en ien de zummer moet het jonge spul groeien en doar hemmen de olders het dan weer hartstikke drok met.
Aan de aandere kaant van de A7 lijt het Lepterdiep met aangrenzend het noatuurgebied de drie Polders, het gedeelte dat al kloar is. Doarover n volgende keer.
Piet de Vries
Mientje: Dat is proat as n pet zunner klep!
