Ik proat plat

Afbeelding
ik proat plat! doe ok?

Mien mamme had het er vroeger al over, De Povvert en De Pannekoek. Wij deden voak een spultje, om de beurt een letter uut e kraant prikken en dan zoveul mogelek ploatsnoamen met die letter opschrieven. Dan kwammen dizze twee der altied uut as t om de letter P ging.


As kiend had ik gien idee wat of dat veur dörpen wadden. Loater, ree ik der wel es laangs met e plof. Het stelt niet veul veur, De Povvert, een poar huzen en dat is t, je bennen zo deur t gehucht hin.


Nog weer loater ree ik der voak met de auto langs. Vanof Tolbert binnendeur noar Stad toe. Wat mie dan altied opviel was dat er een bordje ston, met verwiezing noar n meulen die wat verder op ien t laand ston. Volgens de tekst op t bordje was die meulen niet te bezichtegen. Ien mien beleving kon dat mor twee oorzoaken hemmen. Of der wonende minsen bij die meulen die de drokte om e deur niet hemmen wollen, of de meulen was het bezichtegen niet weerd. Even zuken op internet leert dat de meulen tegenwoordeg elektrisch aandreven wordt. Alhoewel hij nog wel draaien kin. Het gijt hier om de Zuidwendinger meulen die onder Vierverloaten valt.


Verder ken ik De Povvert van t scheuveln. As t goed vroor dan kon je vanof t Leekstermeer bij Paviljoen Cnossen toertochten rieden van zo’n viefentwinteg kilometer. Via grote tochtsloten ging je noar de Ronervoart, even klunen over t diekje en dan via de voart noar t meer. Rechtsof en dan over het diep via Oostwold noar De Povvert. As je doar eerst mor wadden, want dan ging je richting Eementil en kreeg je de oostewiend ien e rug. Dan kon de gang der ien. Mor ja, dat is laank leden.


Wat ok opviel ien De Povvert was dat er altied nog wat van n scheepswarf te zien was. Aan de aandere kaant van t wotter stonden wat olle gebouwen met n huus en ok één of aandere driepoot, een soort toakel of zo. Noazoeken brengt de ienformoatie dat het ienderdoad een olle scheepswarf is. Ien 1884 sticht deur Jacob Jans Mulder. De warf had de noam “De Spitse Horn”. Is verschillende keren overnommen en Eltje Apol begon er een krenghelling en handelde ien rondholt. Noa de tweede wereldoorlog werden der ok proamen ombouwd tot woonarken. Gelukkeg is er tweeëntwinteg joar leden één west die het sjofele spul kocht het en het nou opknapt. Je kennen der allènt mor kommen met n veerpont. Ok stijt er nog n olle smederij.


De noam De Povvert komt van n vroegere herberg. Doar ston povvert as hoofdgerecht op et menu. Ien e omgeving stonden drie herbergen noast mekoar, De Pannekoek, De Poffert en De Meelzak. Van De Pannekoek is niet zoveul bekend, het enege is ienderdoad de Herberg. Het verhoal gijt dat de herberg ofbroken worden most omdat de overheid der n gevangenis bouwen wol. Doar is nooit wat van kommen. Het woord pannekoek wordt ok bruukt veur drasseg en slap laand. Noa bestudering van de geschiedenis bennen De Poffert en De Pannekoek meer goan betekenen veur mij. Der is vast nog veul meer over te vienden. Vast stijt wel dat op een kruuspunt van deurgoande wotterwegen ooit beheurleke bedrievegheid west het. Bliede dat mien mamme der ooit over proatte en dat doardeur mien belangstelling veur dit gebied wekt is. Ik kiek der nou met hiele aandere ogen noar.


Piet de Vries


Mientje: Al is de pankoek nog zo dun, hij het altied twee kanten.

UIT DE KRANT