Ik proat plat
Pas op
t Gemeentebestuur van t Westerkwartier het het ien e kop kregen om alle knelpunten ien de verkeerswegen aan te pakken. Doarbij gijt het ondermeer over de verbiending tussen Leek en Zuudhörn. En dat liekt mij gien overbodege luxe. Ok al ben ik zulf gien veurstander van meer asfalt (minsen moeten het mor wat kalmer aan doen). De körtste route tussen Leek en Zuudhörn gijt over de Pasop. En die weg dut zien noam eer aan. Het is er uutkieken gebloazen, de weg is smal en bochteg en der komt nogal wat verkeer langs, fietsers, auto’s en landbouwverkeer. Je kinnen denken dat de noam Pasop doardeur ontstoan is, mor t is woarschienlek aans.
Der binnen geleerden die denken dat et van t Latijns woord: “Pascua”of “Pascere” komt wat zoveul betekent as ‘gemeenschappeleke weidegronden’. Nou klopt het dat et gebied ien e 16e eeuw deel uutmoek van e Midwolder Mienscheer, een gebied met gemeenschappeleke gronden woar boeren uut e hiele omgeving gebruuk van moeken. Aan e Noordkant van dizze Mienscheer ston vroeger een herberg, genoamd “Klein Auwemoa” ien e volksmond hiette die tent “Pasop”. Die noam Auwemoa verwiest noar de Auwemoa’s uut Tolbert, die nogal wat bezittings hadden ien e omgeving van Eementil en dus regelmoateg over de Pasop mosten. t Brugje over de Matsloot hiet nog altied de “Auwematil”.
Op Delpher vond ik n prachtege advertentie uut jannewoarie 1856 woarien de herberg te koop zet wordt deur de weduwe van Sietse Jans Bousema. Het mooiste van dizze advertentie vien ik de titel van de weduwe Grietje Olthof. Ze was “Kasteleines en Landbouwersche”. Op n ander plak wordt ze omschreven as “Tappersche”. Prachtege titels, kom doar tegenwoordeg nog es om. Wat ok mooi is, is t ploatje dat er bij stijt. Een getekend huuske met n hooikiep der noast, zol t er ien werkelekheid zo uutzien hemmen? Je zollen het doar, ien e Onlanden van Pasop, zo weer bouwen willen.
Want dat is wat het worden is, De Onlanden een prachteg natuurgebied, met schitterende plakjes om te wonen. Het is te hopen dat de gemeente Westerkwartier dit mooie gebied niet verknalt met asfalt. Argens parallel een mooi fietspad of zo, dan is het al n stuk veileger. En dan doen de auto’s der mor wat langer over van Leek noar Zuudhörn en weerom. En “Club 94” is toch dicht, dus wat dat betreft heb je der niks meer te zuken.
Piet de Vries
Mientje: Pas op met uutkieken!
