Ik proat plat
Café London
Engeland ien t Westerkertier bestond echt, hoewel t op gien enkele koart te vienden is, zulfs niet op heule olle koarten. t Gebied dat Engeland noemt werd lag tussen Seballeburen en Eekeburen.
Engeland en Eekeburen is nou beter bekend as Ollekerk.
Ien t centrum van Engeland stond n herberg onder de noam ‘London’ , eigenoar was de familie Ouwinga. ’London’ op zien Engels schreven en niet Londen op zien Nederlands.
As je van Boerakker noar Seballeburen of Ollekerk goan, rie je over de Munnikeweg recht op café London aan. Dizze weg wordt ien e volksmond nog altied de Londense stroatweg noemt.
Officieel is er over dit London en de Londense stroatweg niks te vienden en dus zal t zo weden dat de noamen toevalleg ienburgerd bennen.
Over het ontstoan van e noamen bennen verschillende menings.
Zo zollen der ien e 19e eeuw veul jonge zwienen noar Londen verhandeld weden en e koopmannen die dizze zwientjes kochten, kwammen dan ien e herberg van Ouwinga. Omdat die koopmannen toen veul starke verhoalen hadden over Londen, kreeg de herberg de noam ‘London’.
Een andere mening is, dat er ien 1795 een rieke Grunneger uutweek noar Engeland mor ien 1813 weerom kwam. Hij zol de man west weden die de herberg bouwen liet en de noam ‘London’ gaf.
De derde mening gijt nog verder terug. Piet Ouwinga, de leste kastelein van café ‘London’ is van mening dat de noam te danken is aan de olle peerdenmarkt van Seballeburen die altied op Hemelvoartsdag holden werd. Ien e 17e eeuw was dizze peerdemarkt er al. t Was n heule grote markt woar veul volk op ofkwam. Op Hemelvoartsdag werd dan ok n kermis holden en wel rondom de kerk, op et kerkhof. De kerk zelf was verhuurd aan tappers en kroamholders. Deur de marktluu en t volk werd er, zoas gebrukelek op marktdoagen een stevige neut dronken. Der kwammen ok veul butenlanders, zoals Engelsen en Russen op of. De herbergen ien Seballeburen wadden over t algemeen al gauw vol, zodoende kwammen de Engelsen bij café London terecht. Hun peerden hadden ze ien n stuk laand vlakbij t café jagt. Zodoende ging men t laand Engeland noemen en t café ‘London’. De Russen die de markt bezöchten weken uut noar Niekerk, ien e buurt van Schipsloot en ien e volksmond ontstijt dan al gauw de noam ‘Klein Rusland’. Ien t begun van e 19e eeuw was t doan met dizze beroemde peerdemarkt en dus ok, tot vreugde van de dominee en de kerkbestuurders, met het ‘zundege’ gedrag op het kerkhof.
Wanneer de herberg nou precies bouwd is, is niet bekend. Wel is bekend dat er drie generoaties Ouwinga as kastelein werkzoam west bennen. Volgens de Ouwinga’s is de herberg deur hun veurvoader omstreeks 1800 bouwd. Ien november 1912 werd er n bouwaanvroag iendiend bij de gemeente Ollekerk veur het stichten van n gebouw. t Gebouw kreeg de bestemming warkploats en most kommen op et plak van de aanwezege stookhut. Ien dizze akte stond dat de eerdere vrouw Ouwinga van beroep ‘kasteleinsche’ was. Heur man Hendrik Ouwinga was ien 1907 overleden. Omstreeks 1929 het Piet Ouwinga t café overnommen van zien moeke.
Van e kroeg alleen kon je ien die tied ok al niet bestoan. Vrouw Ouwinga dee t café en Piet Ouwinga had er nog wat koeien bij en ok nog n vrachtwoagen om aan e kost te kommen. Om vier uur smiddags kwam er n andere chauffeur op e vrachtwoagen, want Piet most zien koeien melken. t Café was toen al lang niet meer een herberg veur koopluu. Ze mosten et van e ploatseleke middenstanders hemmen, dat wadden de grootste ofnemmers.
Al was et gien slieterij, der werd wel drank verkocht. Mien moeke vertelde dat ze vroeger wel henstuurd werd om een half moatje jenever te hoalen. Ze kreeg dan n klein fleske met en doar werd, vanuut n moatbeker, de jenever ienschonken. Bij mien grootolders gebeurde dat allinneg op ollejoarsdag, want dan kon der visite kommen en die verwachtende dan vanzulf een borreltje. Met het overlieden van e leste kastelein, Piet Ouwinga ien 1974, was t ok gebeurd met et café.
En hoe de noam ok ontstoan is, moakt niet uut, ‘London’ stijt nog altied op e gevel van de vroegere herberg.
Leneke Struiksma
Mientje: Elk proat van mien drinken, gieneen van mien dörst