Ik proat plat

Afbeelding
ik proat plat! doe ok?

HJC Manege

Ien Tolbert is t de gewoonte, dat as men wat aanpakt, dat et dan ok goed gebeurt. En doar is de HJC manege een goed veurbeeld van. Met de nije indoor-riehal van 45 bij 80 meter is et de grootste van Nederland. De vloeren binnen zogenoamde eb- en vloedvloeren, wat zeggen wil dat de vloeren zich aanpassen aan e (weers)omstandegheden en dat is woarom alle toppers uut Nederland groag ien Tolbert rieden. 


t Was ien t joar 1968 dat n poar notoabelen uut Tolbert de koppen bie mekoar staken omdat ze vonden dat et ien t dörp met rasse schreden achteruut liep. Woar ooit Tolbert het levendege centrum van t Zudelek Westerketier was, begon de machine te hoapern. Der verdween handel en negotie krekt zoas ien veul andere lutje dörpkes en veur de jeugd was er ok aal minder te doen. Eén van die heren had zien dat Prins Bernhard een manege te koop had. Dizze manege ston ien Diepenheim en was van Prinses Armgard van Lippe Biesterveld, de mamme van de prins.


Een Tolberter delegatie ging der op òf en drekt werd tot de aankoop besloten, want t spultje kostte nog gien 20.000 gulden. Ien Tolbert werden mannen optrommelt om met te helpen met et verhuzen. Met n man of 70 bennen ze 8 zotterdoagen hinneweer west noar Diepenheim om de manege over te brengen. De toenmoalege moakeloar J. Venema zee het as volgt ien e krant: “Och we doen wel es voaker roar ien Tolbert”.


Met man en macht werd de holten manege weer opbouwd en t geheel werd onderbrocht ien e stichting “Hedde Jan Cazemier Manege”, vernuumd noar n boer en veehandeloar uut n bekende Tolberter familie (denk aan de CazemierBoerderij). Op één of andere menier het et stichtingsbestuur toen al een zeer veuruutziende blik had, want ze trokken de 17-joarege Louwe Mulder aan as stallejonge. Een golden greep, want onder de bezieling van dizze man is de manege uutgroeid tot wat het nou is. Woar ien e oflopen joaren maneges het moeilek en zwoar hadden is de zoak ien Tolbert uutgroeid tot n hypermodern hippisch centrum ien Noord Nederland. Mulder is altied ien veur wat aparts. Zo ree de bekende RTV-Noord-man Jobke Nienhuus der ooit op n kameel rond, kermend zee der: ‘t Zoakje beneden zit mie wel ien e knel’. Ok hoalde Mulder et nijs toen er Russische legervoertugen kocht om te dienen als overnachtingsplak veur de gasten.


Der is altied wat te doen, zowel binnen as buten. Concoursen, keurings, trainingen, mor ok wedstrieden en lessen. De blik van Louwe Mulder was dan ok veul groter dan zien manege allinneg. Hij richtte soamen met andern de stichting “Westerkwartier Paardenkwartier” op. En om veul dingen te kinnen financieren handelde hij joarenlang ien peerden. Hij was een van e eersten die ien zien eentje noar Finland reisde om doar goeie peerden uut te zuken. En nog loater ging er noar Rusland. Hij vertelde mij es n keer, dat toen er ien Rusland uut t vliegtuug stapte dat er bie zichzulf docht: “Wat doe ik hier toch, ik ben ja mor n doodgewone stallejonge uut Tolbert”.


Hoe het ok zij, Tolbert het n prachtege hippische accommodoatie woar altied wat te doen is. Met dank aan e Toberter gemeenschap. De krant kopte ien 1968 dat er ien Tolbert n “Koninkleke Manege” kwam. Ok al zal die titel niet officieel voerd worden kinnen, t is ien elks geval bie t Koninkleke of. Goa der mor es kieken, ien e foyer kin je altied n kop kovvie of n ander drankje kopen.


Piet de Vries


Mientje:  Wel de teugel slap hangen let, kin met n mak peerd nog op e kletter sloagen.

UIT DE KRANT

Lees ook