Ik proat plat - Die van hiernoast

Afbeelding
ik proat plat! doe ok?

t Is toch meroakels vrimd dat Doezum al drie keer ien opsproak west het, as t om t oprollen van drugspraktieken gijt.


De eerste keer was ien 1977, toen was t groot nijs, t ston ien alle grode kranten van Nederland. Zuks kwam ien die tied niet voak veur, niet ien t Noorden, loat stoan ien Doezum.


Op woensdag 5 jannewoarie 1977 rond tien uur het de  ‘Rijkspolitie’ van Grunnen en Friesland ien n gezoameleke actie een inne moakt aan n keten van amfetamineproductie. Ien vier huzen werden ienvallen doan en totaal werden der drie mannen en n vrouw arresteerd.


De ienvallen wadden ien n huus op e Jonkersvoart, woar n grode opslag grondstoffen aantrovven werd en ien n  boerderij ien Doezum woar t labaratorium was. En ien Makkinga woar t ruwe product ien amfetamine omzet wer.


Toen de politie ien  Doezum de ienval dee, was t laboratorium vol ien bedrief. Naargens was n deur op slöt, ze konden der zo ienlopen. Der wer zulfs n compleet nij laboratorium aantrovven, nog ien deuzen, ze wadden nog heul wat van plan. De krachtstroom die neudeg was, veur de fabricage van t ruwe product,  werd buten de meter om betrokken. De boerderij zulf kreeg wel stroom via de meter. 


De politie had al verscheidene tips van buurtbewoners kregen, want er was, volgens heur, wat vrimds aan e hand op de boerderij aan e Eesterweg ien Doezum. Snachts kwam er op vrimde tieden veziede, ok wer der van alles hinbrocht en weer ophoald. De buurtbewoners zagen dat er snachts rook uut e schostien kwam en dan roken ze ok n heule scharpe lucht. Dat zal dan ether en zoltzuur west weden, want dat is neudeg om de drugs te moaken.


De tips wadden een poar moand eerder bij de politie binnenkommen en met de ienvallen hadden ze de grootste, tot dan toe, bekende productieketen van amfetamine oprold.


Ien Doezum vonden ze 40 liter ruw product, doar kin je zeuven kilo zuvere amfetamine van moaken. Ien Makkinga hadden ze ok al tien kilo zuvere amphetamine vonden. De eindgebruker van toen mos 45 gulden per gram betoalen. Reken mor uut, n heule vangst veur die tied. 


Trouwens, de gearresteerden ontkennende dat ze bezeg wadden om amphetamine te moaken, ze zeiden dat ze bezig wadden om parfum te moaken! Verder werden er nog schilderijen van bekende meesters, antiek en Perzische tapijten ontdekt. Een groot onderzoek volgde en t werd landelek nijs.


Amfetamine werd ontdekt ien 1887 en ien 1927 kwam men er achter dat et verlichting gaf bij astma en bronchitis. Mor al gauw ontdekkende ze dat et ok ernstege  bijwerkings had. 


Ien e tweede Wereldoorlog werd et middel veurschreven aan piloten en soldoaten. Deur t gebruuk van amfetamine konden ze langer alert blieven. Ok zol et vermoeidheid en honger verdrieven. Mor t veroorzoakte ok hartklachten en doardeur bennen der ien oorlogstied veul soldoaten overleden aan t gebruuk van amfetamine.


Ien november 2011 werden der mensen aan e Provincialeweg ien Doezum snachts wakker deur veul geroas en glasgerinkel. t Bliekt n ruziënd echtpoar te wezen. t Ging er zo bot om weg, dat de buren de politie bellende. De agenten proberende de vrouw te sussen, mor ze was zo kwoad op heur kirrel dat ze zee: “Jim moet mor es even op zolder kieken wat hij allemoal om haans het.” Ja, toen ha-je de poppen aan t dansen. Op e zolder van e schuur werd n hennepkwekerij met 1500 plantjes vonden . Ok hier werd de stroom veur de meter òftapt.


De kweekmaterioaln en e plantjes werden vernietigd en noar de man en vrouw werd onderzoek doan.


Ien Doezum het gieneen ze ooit weer zien.


Veur de derde keer is t roak ien feberwoari 2017, weer aan de Eesterweg ien Doezum, mor op n andere boerderij dan ien 1977. Een hennepkwekerij ien n jirrekelder met n verbörgen iegang. Hoe bedenk je t! Ok dizze keer dee de politie noar aanleiding van tips een grote ienval op meerdere plakken. Drachten, Burgum, Hollerwiek en ien Doezum. Hier trovven ze ien e gierkelder 480 planten aan, met n stroatweerde van 40.000 euro. Totoal werden der vief personen arresteerd, woaronder een man en n vrouw uut Doezum. t Vermoeden was dat er al joaren hennep teeld werd, dus ze hemmen vast dikke winst moakt. Ze werden ok allemoal verdacht van geld witwassen en er werd beslag leid op vief auto’s, drie aanhangers, heftrucks en n boot. 


t Is wel frappant dat dit al drie keer gebeurd is ien Doezum en alle drie keer noar aanleiding van tips van omwonenden. Dus as je van plan binnen om wat met drugs te doen, doe t niet ien Doezum, want dan duurt et vast niet lang. t Is net as ien t verske ‘Niks ien e reken, die van hiernoast.’


Leneke Struiksma 


Mientje: ‘Al te goed, is buurmans gek!’

UIT DE KRANT

Lees ook