Ik Proat Plat – Douwe Broersma Zonen

Viefteg joar leden was et ien t Grunneger (en t Friese) Stroobos doageleks een drokte van belang. Scheepswarf Barkmeijer, Veevoerbedrief de Poel, een flinke jachtwarf, Installateur Detmar en zonwering De Haan wadden flinke bedrieven veur zo’n lut dörpke. Mor de boventoon had transportbedrijf ‘Douwe Broersma & Zonen’. De herkenboare vrachtauto’s, met wit, rood en groen, zag je rieden deur hiel Nederland en grote delen van Europa. Altied onderwegens en ‘Met de vlam in de pijp”.

Ien 1857 kocht Tjeerd Douwes Broersma de trekschuit ‘De Nijverheid’ (zie foto: In het dorp Enumatil met Broersma aan het roer. Bron:  Klaas van der Schuit)  en begon soamen met zeun Feddrik n beurtdienst op Dokkum, die loater uutbreid werd noar Stad en Leeuwarden. Hij vervoerde meestieds slachtkoeien en bollen en moek doarnoa de boot vlug weer schoon om n week loater groan te vervoeren. Ten tiede van zien kleinzeun Douwe werd ien 1931 de eerste vrachtauto kocht. t Wegverkeer kwam meer ien e mode en zo kon je de klant van deur tot deur bedienen. Broersma bleef lang een familiebedrief – Douwe had ok weer zeuns die ien t bedrief kwammen. Ien 1948 kwam de eerste chauffeur ien dienst toen Broersma transportbedrief De Poel overnam.

Ien e volksmond werd et bedrief ok voak ‘Douwe Kater’ nuumd. Mien pabbe riep ok altied:  ‘Doar ridt weer één van Douwe Kater!’ as we onderweegs zo’n herkenboare woagen met rood en groen tegen kwammen. Mor woar de bijnoam vandoan komt, blift -tot nog toe-  een roadsel!

De eerste auto’s van t bedrief wadden van verscheidene merken zoas t Nederlandse Kromhout en Chevrolet. Noa de oorlog was er veul materioal beschikboar dat eerder ien t leger dienst doan had. Dat materioal werd ombouwd veur Broersma. Loater ston t bedrief veural bekend om heur dikke Scania’s, al reden der ok woagens van Magirus Deutz, Fiat en Daf. De bekende bedriefskleuren, rooie cabine, witte trailler met de bekende rood-witte strepen, kwam je aal voaker tegen op e weg. 

Ien e vieftiger joaren nammen 4 zeuns van Douwe de leiding van de zoak over en werd et bedrief al mor groter en groter. Ien 1963 kwam er n tweede Broersma-vesteging ien Bodegraven, doar werd Tjeerd Broersma de directeur. Op t olle stee aan e Groninger Streek had et bedrief niet genog ruumte meer en ok doar werd noar n nij plak zöcht. Eefkes was er zelfs sproake van verhuzen noar Leeuwarden, mor uuteindelek  kwam et bedrief aan e noordkant van t Hoendiep terecht. Ien mei 1966 werd et nije gebouw, met kantoren, n garage en n vrieskelder ien gebruuk nommen en stonden der 12 Scania Vabissen te glimmen ien e bedriefshal. Op dat moment waarkende der 44 personen en reden er meer dan 20 woagens op e weg. 

De joaren die derop volgende groeide et bedrief alsmor verder. Extra terrein, grotere koelruumtes en n apart nij kantoorgebouw. Meer auto’s en op e duur over de 100 chauffeurs. Broersma kwam je zelfs op vakanzie overal tegen, want Duutsland, Italië, Frankriek en Denemarken wadden veur internationale chauffeurs bekend terrein. Veur summege vaste opdrachtgevers werden auto’s ien aparte kleuren vaarfd en langs de Autobahn mos -je niet roar opkieken as er n poar Broersma-woagens, netjes ien t gelid, de nacht deurbrochten.  

Onder druk van de groeiende concurrentie, Stroobos zol te ver van e snelweg leggen en tied is geld, werd ien 1994 begonnen met tekenen van plannen om t bedrief te verhuzen noar Heerenveen. Die locoatie werd ien 2001 opend deur Annemarie Jorritsma, mor de vreugde was van körte duur. 

Lees veur de roerege ofloop, ien juli et tweede deel van e geschiedenis van ‘Douwe Kater’. Bij et schrieven van dit stuk, kwammen der veul reacties van old-medewerkers, met herinnerings aan hun olle werkgever en aan de oaventuren die ze onderweegs of op kantoor beleeft hemmen.  Materioal genog veur n tweede deel.

Wel nog wat wiet, wat et vermelden weerd is, of wiet woar de bijnoam ‘Douwe Kater’ weg komt, kin n reactie sturen noar info@mienwesterkwartier.nl 

Geert Zijlstra


Mientje: ‘Toen dokter vroeg ‘Sport u?’ Knikte de chauffeur: ‘Jazeker, tran- sport!’