Ik Proat Plat – Vekanzie

t Is n veurrecht as je elk joar op vakansie kinnen. As baby werd ik metsleept noar de Zuursche Dunen, zulfs t babyhuuske ging met en joarenlang gingen we met mien olders noar Nörg ien n holten zummerhuuske. Loater kwam de caravan en konden we wat verder vot. t Was belangriek dat er viswotter was, want dat was de hobby van mien olders. De goeie olle tied, zak eerpels en blikken grauwe erwten met. t Vlees werd metnommen, thuus al broaden en ienblikt. De auto en caravan ofloaden vol, net of er ien andere oorden niks te kriegen is, of niet et zulfde as dat je thuus wend wadden.

De familiedoagen wadden ok mooi, met alle ooms, tantes, neven en nichtjes n dagje noar t Ronostrand of de Kibbelkoele. Doar zatten we met zien allen achter t wiendscherm, de olden op n klapstoeltje en de kiender ien t zand en wotter. Mien ooms kwammen nooit uut e kleren, mor veur die gelegenheid op t strand, kwammen de sokken uut en werden de broekspiepen oprolt, konden ze toch even met de voeten ien t wotter.  

Toen kwam de tied dat je niet meer met je olders op vekansie wollen en met vriendinnen noar t Ronostrand gingen. De eerste butenland vekansie was noar Coo ien België. Dat was n belevenis, n andere toal, vrimd geld, spannend! Elke keer gingen we n stukje verder vot. Noa n poar joar vekansie ien Frankriek kon je al n bietje Frans proaten! Jazeker, een keer gingen we uut eten, we dochten dat we boontjes (escargot) besteld hadden. Wat keken we roar op toen er slakken op ons bord lagen. Wat gedoe, je mosten ze met tangkje uut et huuske peutern en opeten. Nou mooi niet, ik docht nog wel even aan e eerappels en blikken vlees, die we vroeger metnammen. 

Toen kwam de tied van vliegvekansies. Dat was n belevenis die eerste keer ien n vliegtuug. Al had je toen minder zörg of je wel op tied ien t vliegtuug kwammen en of de koffer wel met kommen zol. Griekenland was prachteg en altied mooi weer. Man en kiender wadden wel es zat van mien ideeën om n kasteel of n historische ofgroaving te bekieken. ‘Weer n olle stienenbult bekieken!’

Dit joar hemmen we weer n meroakelse vekansie had, nogal aans dan aans. Een rondreis met n bus. We kwammen der achter dat n rondreis gien vekansie is. Je stoan op tied, want der binnen òfsproken moakt met hotels en de chauffeur moet aan zien rietieden denken. Mor t was meroakels mooi. We gingen via Duutsland, Denemarken noar Zweden. Met n gids hemmen we de stad Stockholm bekeken. Snachts op e boot noar Finland en Helsinki bekeken. Mooie steden, bouwd op eilandjes die met bruggen met mekoar verbonden binnen. Doarnoa begon de lange reis noar t noorden van Finland, noar Rovaniemi, de poort van Lapland. We passerende de poolcirkel woar de kerstman woont ien n commercieel park, dus mor gauw verder. Finland t land van de oneindege bossen, de ontelboare meren en de rendieren die zo mor veur de bus op e weg lopen. Noadat we over de grins noar Noorwegen gingen werd et landschap koaler met hoge bergen met snij en werden de wegen al smaller. 

Ien Noors Lapland bezöchten we de bewoners van Lapland, de Sami. Lapland is verdeeld over Rusland, Finland en Noorwegen en het elf verschillende dialecten en klederdrachten. Deur al die verschillende dialecten kinnen de minsen mekoar niet verstoan.

 t Was mooi om te zien hoe de Sami leven en al binnen ze gien nomaden meer, der stoan nog wel tipi’s. Mor ze wonen tegenwoordeg ok ien eenvoudige huuskes. t Hoogtepunt van e reis was de Noordkaap. Om elf uur ien e oavend stonden we ien t volle zönlicht op e Noordkaap (Foto: Uutwisseling, Leneke en Siemen op e Noordkaap, stenen uut Scandinavie ien et Westerkwartier). n Apart gevoel as je op t allernoordelekste puntje van t vasteland van Europa stoan. Niet te bevatten dat et dag en nacht licht blift. 

t Idee van ‘nou moet ik mor es op berre’ krieg je hier niet. Ok zagen we veul minsen die dizze reis op e fiets moeken,  diep respect!

De weerom reis ging deur t prachtege Noorwegen, wat weer aans is dan Zweden en Finland. Noorwegen is noar mien idee één van de mooiste landen van Europa. We hemmen ok nog n fjorden boottocht moakt en schitterende natuur zien. Al met al n meroakelse vekansie , veul musea en mooie plakjes bezöcht met as echt hoogtepunt: de Noordkaap.

Aan alle vekansies, van Norg tot aan e Noordkaap heb ik goeie herinneringen mor der  komt altied weer n enne aan. En toch,  t allermooiste van e vekansie is, dat je weer thuus kommen ien ons meroakels mooie Westerkwartier.

Leneke Struiksma


Mientje:  Woar gijt dien reis dizze keer hinne!