Kamperen of creperen
Ooit was ik er hielendal op uutkeken, op dat kamperen. Dat was toen ik op n oavend argens ien Slowakije ien het kleine veurstukje van ons tentje zat te lezen. De kop kon niet rechtop, want doar was het niet hoog genog veur. En om die reden zat ik ok op n hiel leeg stoeltje, dus de kin kwam zon bietje op e knijen. En doar tussenien mos dan dat boek nog pazen. En dan ieneenent is dat moment doar: “Woarom doe ik dit. Vien ik dit nou echt fijn”.
Kiek, de poar oavends doarveur was t gien probleem west. Heerleke temperatuur en lekker dreug. Om ons hin t geluud van krekels en aandere nachtdieren. Lekker buten zitten, benen en rug laankuut en genieten. Heerlek, gewoon gien zin om sloapen te goan. En as je dan uuteindelek wel op berre kropen, dan was t hartstikke gezelleg en romantisch ok nog. Mor nou, t was kold en t regende. Om t gaslampke, dat schief achter mie hing veur wat licht op t boek, kronkelden neefkes en nachtvlinders. Mien blote arms zatten vol met jeukbulten omdat ze mij bliekboar lekkerder vienden dan mien vrouw.
En dan komt het. “Gezelleg zo he?” zeit ze. Ik zeg niet dreks wat. Bin op mien hoede. Heur veur de kop steuten wil ik niet, mor ik ben mij ok bewust van t feit dat ik nou goed op pazen moet met wat ik zeg, want dit wordt crucioal veur alle vekaanzies die ik nog met heur krieg. “Tuurlek is t gezelleg” zeg ik, “doar leit t niet aan. Mor moest es kieken hoe of dat ik hier zit. Ik bin dubbelvold en mien rug knapt zowat. Doarbie zit ik vol met jeukbulten en ik zit miezulf ien t licht en kin dus host niet lezen”.
Gelukkeg wer t gien discussie. Ze zag en begreep mien problemen en dus kwamen we al vrij snel aan e proat over hoe het ien t vervolg dan wel goan mos. n Caravan meschien? Dat zol wel hiel burgerlek worden. Zummerhuuskes of n hotel dan? Vanof het moment dat we der over aan t proaten wadden was t ok geliek allemoal niet zo slim meer. Der scheen zulfs dizze oavend licht aan e horizon.
Woarom vertel ik jim dit verhoal, hier zit gieneen op te wachten, zol je denken. Nou, op dit moment zit ik ien n caravan, Starker nog, ik woon der ien, meschien wel veur 1 a 2 joar. Ien e 30 joar die tussen t bovenstoande verhoal en dit moment zit, hemmen we allerlei verschillende soorten vekaanzies holden. De meesten doarvan wadden met n camper. n Luxe vörm van kamperen woarvan je smörgens niet wieten woar of je soavends sloapen zellen. Werkelek aan te bevelen. Mor nou hemmen we ons huus verkocht en hemmen we n plakje vonden woar we wat nijs bouwen willen. En veurdat we deur de bureaucratie van aanvroagens en vergunnings hin bennen en veurdat de bouwers het delzet hemmen mozzen we n oplössing zuken. En doarom wonen we ien n caravan. Wel met schiethuus, douche, warm en kold wotter en ja, ok n goeie kachel. Dus wordt het niet creperen.
Mientje: Goa noar Meppel te kop keren!