Ik proat plat
Discotheek Pruum
As je tegenwoardeg deur Zeuvenhuzen hinrieden, dan moe-je de kop mor omdroaien as je bij de vroegere disco van Pruum langs rieden. Het is alderbedroefst zo’n beroerd gezicht is het. Je zollen der host om janken. Een hiele dikke, gore brut. En dan te bedenken dat dit ooit een fantastisch uutgoanscentrum was. Hiel vroeger veur jong en old en loater allent veur de jeugd. Meschien leit ien dat leste wel de uuteindeleke ondergang van t geheel, ien elks geval is van alle glorie niks meer over. En dan te bedenken dat het ooit een aantrekkingskracht had, woar elke horecaondernemer jaloers op wezen kon.
Eén van e eerste berichten die ik tegenkwam was uut 1963. Een aankondeging van n dansoavend die al om zeuven uur begon.
“Dansen, Op veler verzoek m.m.v. Little John and his Rocking Tigers.”
Uut 1965 een mooi verhoal over t optreden van Don Mercedes. Ze zollen om zeuven uur begunnen, mor om acht uur, om negen uur en zelfs om tien uur was er nog gien Don Mercedes. Toen gingen de mensen noar huus, het wer te loat. Wat was er nou aan e haand. Don Mercedes was noar Zeuvenhuzen bie Den Hoag togen en kon doar gien café Pruum vienden. Een week loater bood Jan Pruum doarom mor een groates dansoavend aan.
Ien 1965 en 1966 deed Jan het bedrief ien e verkoop. Hij ploatste advertenties ien grote landeleke kranten.
“Te koop wegens dubbele zaken, een prima CAFÉ-REST. Dancing Slijterijbedrijf in het Westerkwartier van Groningen, het pand is geheel gemoderniseerd, voldoet aan alle eisen.
Ien 1969 werd het opnij aanboden. Uuteindelek is het niet lukt. Ientussen ging Jan deur met het organiseren van feesten, met noame ien e feestweek. Gert en Hermien met de grote TV-show ien ‘68. De Heikrekels, Swiebertje met de hiele crew. Een dansfestijn met The Shoes.En dat ging zo deur.
Ien e zeuventeger joaren kwammen de DIZZY MAN’s BAND, de VERONICA DRIVE-IN SHOW en MAD DOG. Het kon niet op. Wat te denken van Next One, Avro’s Toppop Discoshow en Hank The Knife and the Jets.
Het was allemoal de opmoat noar n ongekend succes. Pruum Zeuvenhuzen werd een uutgoansgelegenheid van ongekende omvang. Het gebouw werd groter en groter en men was ien stoat om ien e weekenden zomor een poar duzend mensen te ontvangen.
De omgeving stond op e kop en was ontzet toen ien 1984 vier jongeluu verongelukten toen ze bie Pruum votkwammen en met de auto uut e bocht vlogen en tegen de brug over het Hoofddiep belandden. Het gaf best een smet op het grote succes, mor dat succes had er niet onder te lieden. Dat kwam met deur de formule “Alles is groates”. Men huufde gien entree te betoalen, ok niet as er “grote” artiesten optraden.
Der kwam nog n keer n smet op t geheel. Dat was toen er ien 1989 trammelant uutbrak met steekpartijen en pistolen. Doar wadden Molukkers uut Oosterwolde bij betrokken en volk uut Leeuwarden. De disco ging zulfs even dicht, het gevoar werd te groot acht.
Doarnoa ging alles weer verder en werden de successen nog groter. Der kwammen groepen as The New Adventures, de Twentse hardrockgroep Teaser, de Bintangs en natuurlek The Golden Earring. Die leste groep zal zich Zeuvenhuzen altied herinnern want toen bij n optreden George Kooymans te pielen zat op zien gitaar kreeg er een soort lichtbom tegen de ziedkant van zien nek. Dat ding explodeerde en Kooymans roakte zo gewond dat er met n noodgang noar het ziekenhuus ien Stad brocht werd.
En zo het bienoa hiel musicerend Nederland wel optreden ien Pruum. André van Duin, Rita Corita, Rowwen Heze, de Havenzangers, Normaal en zo kin ik nog wel even deurgoan. Feest, feest en nog es feest.
Ik las op Internet nog een mooie review van een wichtje uut Amsterdam, die wil ik jim niet ontholden.
“ Hmmmm, Amsterdam is gaaf maar Zevenhuizen, zoiets is pas vet gaaf”.
En nou is t over, het is veurbie. Wat overbleven is, is n grote argernis en niet allent veur de Zeuvenhuusters. De overheden kriegen der gien grip op. Schane!
Piet de Vries
Mientje: “Wel hoog stijt kin leeg vallen.”
