Op e raand
Kuiern is n hobby van mij en et is dus niet vrimd dat ik t Pronkjewailpad loop. t Pronkjewailpad is n wandelpad deur hiel Grunnen, verdeeld ien noord, zuud, oost en west. Totoal ruum 1000 kilometers hemmen we, mien zus en ik, al deur Grunnen lopen en dan kom je op mooie plakjes, woar je met de auto of fiets niet kommen kinnen. De routes goan niet over wegen en rechtstreeks, mor laans mooie padjes deur t laand en ommetjes om en deur de dörpkes. Onderweegs moe-je hier en doar n stempel hoalen. Meestal ien n olle kerk, meulen, museum, winkel, rustpunt, restaurant of n B&B. Sums krieg je dan ok nog n oardegheidje, n pronkjewail noemen ze dat.
Lest liepen we n route van Zuudhörn noar Garnwerd en Schaphalsterziel. Ien Zuudhörn kwammen we drekt veur de Tafelbrug te stoan. Et ding ston omhoog en wol niet meer noar beneden. Gelukkeg huvven we der niet over mor bij t van Starkenborghkanoal laans noar Auwerd, doar konden we wel oversteken richting Steentil. Steentil is n gehuchtje, woarvan de noam verwiest noar de stenen brug over t Auwerderdiep. De huzen van Steentil leggen rond de brug en vroeger was er n kroeg veur schippers. t Pand stijt er nog wel, mor t café is sloten. De brug is bouwd ien e 17e eeuw en is mogelek de oldste brug ien Grunnen en et is n Rijksmonument. Van Steentil lopen we richting Oostum. Op e hoek van de Oostumerweg en Wierumerschouwsterweg stijt n hiel biezunder huus met de noam Huize ‘Dageraad’. Et huus uut 1890 is bouwd ien e vörm van n schip en was de rentenierswoning van ex tjakschipper B. H. Krans uut Veendam.
Op e veurgevel stijt et woapen van Veendam en Wildervank. Jammergenog zigt et huus er nogal vervallen uut, mor ze binnen wel bezig met renoveren. t Mooie van wandeln is dat je de tied nimmen om even goed te kieken, je vroagen of wat je zien, thuus zoek je t even op en kom je te wieten wat de geschiedenis van b.v. zo’n old huus is. Prachteg en dat allemoal zo vlak bij huus.
Oostum is n wierde en het n beschermd dörpsgezicht. n Poar week leden ston ien e krant dat de Oostumer kerk renoveerd is. t Bekende Pieterpad gijt zulfs deur Oostum.
We volgen niet de weg naar Oostum, Krassum en dan noar Garnwerd, mor de route gijt via de Wierumerschouwsterweg, een lange kronkelege weg met veul grauwe abelen aan beide kanten. De grauwe abeel is n soort populier, t lieken net bomen met ogen. Dan goa je over t Reitdiep en verloat je de gemeente Westerkwartier en kommen op t hogelaand.
We lopen laans de olle diek van t Reitdiep noar t gehuchtje Hekkum en via Sauwerd beland je ien Klein Wetsinge en Groot Wetsinge. Dat binnen ok weer van die mooie kleine plakjes. Et kerkje van Klein Wetsinge het boven de kerkzoal n uutkiekpunt woarvandoan je n prachteg uutzicht over t Reitdiepgebied hemmen. Via n padje kom je ien Groot Wetsinge, dat kleiner is dan Klein Wetsinge, mor ok weer n prachteg wierdedorpke.
Via De Raken, over t fietspad bij t Reitdiep laans, bij Garnwerd over de brug en dan bin je weer ien t Westerkwartier. Garnwerd is veul bekender dan al die kleine gehuchtjes der om hin o.a vanwege Café Hamming aan et Reitdiep en et lutjeste stroatje van Nederland. Toen we der deur liepen wadden de stokrozen net uutbloeid, jammer want dat moakt et stroatje nog mooier.
Dizze streek hiet Middag-Humsterland. Middag en Humsterland wadden ien e Middeleeuwen twee eilanden. Al hiel vroeg wonende hier minsen op wierden, hoge bulten grond die heur bescharmen mosten tegen et hoge wotter. Tussen die eilanden lagen dichtslibte wadgeulen, nou nog terug te vienden ien e loop van e sloten. Al die gehuchtjes en dörpkes woar we deur lopen binnen, stoan op wierden. t Gebied het de status Nationaal Landschap en we moeten der slim zuneg op weden.
De reis gijt verder noar Schifpot, over de brug en dan rechts weer bij t Auwerderdiep laans. Bij de brug leggen n aantal woonboten met n stukje grond laans t fietspad, merkwoardeg mor kleurriek.
Laans t Auwerderdiep noar Auwerderziel woar we net op tied wadden veur de veerboot noar Schaphalsterziel. t Auwerderdiep komt uut ien t Reitdiep, t was 20 minuten voaren over t Reitdiep noar Schaphalsterziel, wat weer aan e andere kaant van t Reitdiep leit en zo belanden we weer ien e gemeente
t Hogeland.
Kuierend hemmen we weer hiel wat moois van t Westerkwartier zien en n biezunder stukje van t Hogelaand en dat alpmoal zowat ien je eigen achtertuun! Aan t enne van dizze tocht hemmen we ons zulf tracteerd op n lekker koel drankje op t terras van Garnwerd aan Zee.
Leneke Struiksma
Mientje: ‘Hol die goed vast, kudel niet over de raand!‘