Zwembad Electra

Afbeelding
ik proat plat! doe ok?

Bij buurtschap Lammerburen, doar woar de Kommerzielsterriet ien t Reitdiep uutkomt, stijt niet allinneg et gemoal De Waterwolf, mor ok n camping, een jachthoaven en n zwembad. Een mooi plekje om een poar doagen vekanzie te vieren of een dagje ien e zun te leggen. Zwembad Electra is zeker biezunder omdat et niet ien n dörp leit, mor juust midden ien t laand en t wordt hielmoal ien e benen holden deur vrijwillegers. De noam Electra komt van t eerste wottergemoal van t wotterschap dat op elektriciteit draaide. Ien e volksmond werd de noam Electra bruukt veur t buurtschap en t zwembad dat dit joar al 55 joar bestijt.  


Ien 1918 werd bij et gehucht Lammerburen start met de bouw van et gemoal De Waterwolf, dat twee joar loater ien gebruuk nommen werd. Dit stee was specioal uutzocht om zo een deel van t overtollege wotter van t Westerkwartier kwiet te roaken en op de Waddenzee te lozen.


t Poldergebied rond et Reitdiep tussen Lammerburen en Zoltkamp kon ien geval van nood dienen as boezem bij hoog wotter. t Was nogal n iengreep want er most n sluus op et Reitdiep kommen, de Kommerzielsterriet most verleid worden en der kwam een extra nije weg om et Hoogeland en t Westerkwartier te verbienden. Doarnoast de bouw van t nije gemoal, die meer dan n half miljoen gulden kostte en aan 300 man waark gaf.


Koningin Wilhelmina en prins Hendrik kwammen hoogstpersoonlek langs om dit kunststukje te openen en moeken een rondreis deur de hiele omgeving. Op vrijdag 5 november 1920 stonden de dieken bij Lammerburen zwart van t volk om de hoogheden toe te juichen. “H. M. onze geliefde en geëerbiedigde , Koningin, die, nà een rede van den heer Dojes, lid der Eerste Kamer en voorzitter van „Electra” (die drie bovengenoemde waterschappen bij elkaar) op het electrisch knopje drukte, waarna de machines begonnen te stampen en te zwoegen.” (uut et ‘Dagblad tot verbreiding van Christelijk-Nationale Beginselen’)


Zo ontstond er n biezunder stee aan t Reitdiep woar altied veul volk langs kwam. Ien 1946 was er al n natuurbad ien t Reitdiep. Olle bezoekers wieten nog te vertellen dat et wotter noa n pooske zunneg weer wel 20 groaden was, mor dat ze ok wel zwommen as t veul kolder was. De kwaliteit van t wotter werd deur de joaren hinne steeds slechter. t Werd zwaart en sums was der flauw vis zwom je tussen de dooie vissen. Glasoaltjes wadden ok een ploag, die kropen bij badpakken en zwembroeken ien. En as et gemoal spuide bij zummerdag, mog der niet zwommen worden ien et kolkende wotter.  Doarom werd n plan moakt om een modern zwembad te bouwen en ien 1967 was t zo ver en werd et zwembad opend op de plek woar t nou is. 


Ondanks de biezundere ligging werd en wordt et bad altied goed bezöcht deur bezoekers uut e omgeving en dan niet allinneg uut Houwerziel, Olhoof of Kommerziel. Bij mooie doagen kin et smorende drok weden, mor der altied genog ruumte om te zwemmen en te zunneboaden. Natuurlek heuren bij zwemplezier ok duukplanken, glieboanen en n lange mat over t wotter en ijsco’s om de wotterpret compleet te moaken.


Zwembad Electra (foto: Beeldbank Groningen) draait al lang op e ienzet van n flinke groep van ruum 50 vrijwilligers en doarnoast is er vanzulf gediplomeerd zwembadpersoneel aanwezig om toe te zien op de veiligheid en om zwemles te geven. De vrijwillegers tekenen veur de schoonmaak, de kassa en t onderhold van et uitgebreide terrein. Met subsidie, sponsorgelden en specioale publieksacties worden de cinten bijmekoar schoarpt om et bad ien topconditie te holden. De handjes van de vrijwilligers kinnen doarbij niet mist worden. Om de kosten zo leeg mogelek te holden wordt et wotter verwarmd met behulp van zunnepanelen. Dat scheelt een ‘flinke slok op n borrel’.  Ien t seizoen 2022 wadden der ien augustus al 15.000 bezoekers west en met et mooie weer lopt de teller gewoon deur. 


Ien 1993 zwom zeehond Swiebertje zo mor et Reitdiep op en kwam uut bij Electra, woar der vongen werd deur de minsen van de zeehondencrèche van Pieterburen. Ok dizze zeehond vond n bezoekje aan Electra n woare belevenis want er is doar veul meer dan t zwembad. Aan t Reitdiep is n jachthoaven met ruum 100 plakken, woarvanuut je zo noar t Lauwersmeer of noar Stad voaren kinnen. En op camping ‘De Waterwolf’ is ruum plak veur vaste bezoekers en passanten. Ien t restaurant ien ’seventies’-style kin je n dagje Electra mooi ien stijl ofsluten. 


Geert Zijlstra


Mientje:  “ Doar kinst niks met op e wal kriegen!’

UIT DE KRANT