Kerstgroet uit Zuudhörn: Willem Tjebbe Oostenbrink

ZUUDHÖRN – t Oldjoar leit zowat achter ons mor der is veul gebeurd. Grinzen ien t Westerkertier verdwienen: n grode aksie van Napoleon met iendeleng ien nije gemeenten meer as 200 joar leden, wordt teniet doan.  Grode veraanderengen: De Wilp, Noordwiek, Dörp, Visvliet, Lauwersziel, Soaksum, Ikum, Aizing, Oostum, Nijklap, de Povvert, Lettelbert onder een dak van t Westerkertier. n Nuvere gedachte.

En d’olle spoorlien van Zuudhörn noar Stad wordt verdubbeld – noa 150 joar! t Van Starkenborghknoal is breder en de bruggen bennen hoger mor we blieven zo nou en dan even wachten; is t niet ien Noorhörn of Zuudhörn, dan stoan we op de Goarkeuken.

Wachten is op t eerste gezicht vervelend, t is tiedverlies. Mor met t wachten kommen ok nije gedachten, sums zoveul dat je der n joar met vullen kennen. Nije ienzichten en plannen, n nije koers ien t nije joar, t ken zo mor.

Dit joar hemmen verscheidene gemeenten òfscheid nommen van heur burgers (of omgekeerd?) deur kunst of theoateractiviteiten. t Was de muite weerd.  Ien Zuudhörn was der n kunstmanifestoatsie “Boom aan Z”, met bomen as de oldste ienwoners van e contreien. n Oardeg idee. Tot slöt n poar regels uut t gedicht Ringen:
bomen vangen de tied met ringen
ien t holt. Et tellen van de joaren loaten ze
over aan ons.

Willem Tjebbe Oostenbrink,

Zuudhörn